FFS-XXI Organiza Atividade Konversa Loraik

Alumni Parlamentu Foinsa’e Timor-Leste (APFTL) liuhusi sub-programa Feto Foinsa’e Sékulu-XXI (FFS-XXI) servisu hamutuk ho OXFAM iha Timor-Leste iha Projeitu Fundu Klimátika, organiza atividade koversa loraik ho tema “Feto Hari’i Reziliénsia no Finansiamentu Klimátika”. Objetivu husi atividade ida ne’e hodi halo análiza ba finansiamentu klimátika no rona polítika inisiativa sira ne’ebé governu sira trasa ona, nune’e sei rona mós deskobrimentu sira husi organizasaun sosiedade sivil ne’ebé servisu direita ho komunidade sira no esperiénsia hosi komunidade sira ne’ebé afeta ba impaktu husi mudansa klimátika.

Iha atividade ne’e Prezidenti APFTL Benvinda Gusmão Alves hateten, “asuntu mudansa klimátika la’os ona asuntu nasionál maibé ne’e asuntu global ona, nune’e presiza parte governu, Organizasaun Naun Governamental (NGO), sosiedade sivíl,  foinsa’e sira hamutuk hodi buka solusaun ba mudansa klimátika oinsa mak Feto sira reziliénsia liu tan hodi hasoru mudansa klimátika. Hanesan udan been ne’ebé mai la tuir nia tempu, be’e maran ida ne’e sai kestaun boot ba feto sira. No espera liu husi konversa loraik ida ne’e ita bele produz rezultadu ruma husi konversa  ida ne’e, sai hanesan dokumentu ida ba ita hotu hodi kontinua halo advokasia ba asuntu mudansa klimátika”.

Iha fatin hanesan Country Director País Oxfan iha Timor-Leste afirma, “relasiona ho tema ba atividade ne’e “Feto Hari’i Reziliénsia no Finansiamentu Klimátika”. Ida ne’e reflete ba situasaun iha Timor-Leste feto sira sei hasoru dezafiu oi-oin hanesan norma sosiál sira ne’ebé sei diskrimina feto sira iha uma laran, iha sosiedade no halo polítika no foti desizaun. Impaktu husi Mudansa klimátika sai todan liu tan ba feto sira tanba sira halo servisu barak liu iha uma laran, hanesan tau matan ba oan no familia no seluk tan. Ho ida ne’e, presiza tebes politíka ne’ebé bele asegura igualidade jeneru, grupu vulnerabilidade sira no ema ho nesesidade espesiál nune’e sira bele reziliénsia hasoru mudansa klimátika”.

Oradór sira ba atividade konversa loraik refere maka hanesan tuir mai ne’e:

1.     Sr. Herminio Xavier nu’udar Pontu Fokal ba asuntu klimátika iha Sekretária do Estado de Igualdade (SEI): ko’alia kona-ba “Polítika Sekretária Estadu Igualdade nian ba igualdade jéneru iha ámbitu mudansa klimátika”.

2.     Sra. Efigenia M.M. Makikit nu’udar Pontu Fokal ba projeitu Fundu Klimátika iha APFTL: ko’alia kona-ba “Feto nia Esperiénsia hasoru impaktu husi Mudansa Klimátika”.

3.     Sra. Ramila Fatima da Costa nu’udar Diretora oraganizaun MANEO: ko’alia kona-ba “Asaun Klimátika iha Nível Komunidade”

Atividade konversa lokraik refere, hetan partisipa husi: parte governu, Parseiru Dezenvolvimentu, Organizasaun sosiedade sivíl, Estudante akademiku, Grupu ativista ambientál sira Komunidade. Atividade ne’e realiza tanba hetan apoiu finansiamentu husi Oxfam Timor-Leste no implementa husi APFTL.

#JovenAtivuSaudavelProdutivuKomupetitivuOrgulluNuudarTimorOan